About

Hi, I’m Errieda du Toit,  food lover from Cape Town,  the Huiskok (home cook) of the radio station RSG & an obsessive cookbook collector and recipe magpie.

I am the content producer: food for the reality tv series Kokkedoor and probe nostalgia and food in a cultural context. I authored the Kokkedoor cookbooks and also Masterchef SA-The Cookbook. I write mostly in Afrikaans, my mother tongue – a language rich in expression. 

Nou dat ek die kans het om oor myself te vertel: 

Ek en my man Ian woon en werk saam in Welgemoed, omring met  ‘n mengelmoes katte, kuns, kuiergaste, hope kookboeke. Ons bedryf ‘n skakelmaatskappy oor kos, wyn, dekor en ander lekkerleef dinge.  My kosskrywery, boeke, RSG-radiorubriek en betrokkenheid by Kokkedoor (inhoudsvervaardiger: kos; en skrywer van die Kokkedoor kookboeke) is nog ‘n manier om my kosliefde uit te leef.

Van waar die skryflus: My skryflus kom van kleintyd, met Ma Inez Espost wat self haar kroos se slaaptydstories en liedjies geskryf het. Dit het my verbeeldingswêreld geprikkel, so ook my liefde vir woorde en stories vertel. Die kósliefde het ek ook by my ma geërf. Ek erf ook die vergeelde  resepteboekies wat haar pa (my Oupa Moller) as trousseau vir haar saamgestel het in sy keurige onderwyserhandskrif – hoe om heerlikhede soos afval, kweperlekkers en koeksisters te maak.  Van ander oupa, ‘n Esposito van Italië, kry ek my vurige temperament en liefde vir die Mediterrene.

Mymerkos en kontreiskryfkuns: Ek droom van ‘n sabbatsreis waar ek  die cuisine du  terroir  –  die unieke kostaal van ‘n kontrei –  kan bestudeer soos veldkool van die Weskus en kambro uit die Karoo; brood uit  ‘n bakoond op ‘n trekboerroete in die Sederberge. Suurvye uit die Sandveld.

Kos mense wat ek bewonder:  Peter Veldsman spreek tot my inner-raconteur. Lannice Snyman is my kos-engel. Kobus van der Merwe van Oep ve Koep in Paternoster se vars benadering tot Weskus kontreikos; sjef Nic van Wyk  vir ongekunstelde super-lekker kos. Richard Carstens verskuif my kosgrense. My vriendin Daleen – kookboek-uitgewer en skilferkors-koningin. Ottolenghi. Die Italiaanse sjef Massimo Bottura, die Ierse kosskrywer Diane Henry.  Hetta van Deventer se kennis van kosgeskiedenis. Die kokkedoor-deelnemers vir hulle waagmoed.

Ander belangstellings: Reis. Buenos Aires.  Prins Albert is my spirituele huis. Zanzibar is my nuwe ontdekking.  Ek  geniet om net die kar te vat en kambro in die Karoo te gaan soek. Lees, alles waarop ek my hande kan lê. My versameling kookboeke groei by die dag. Daar is boeke op die bedkassie, in die sitkamer, op die ou tweepoot-tafel in die voorportaal, dit stroom oor my tuiskantoor se lessenaar, lê op voetstoele en voor kaggels, in hopies langs ‘n ou leunstoel, tot in die kleinhuisie.  Ek is gefassineer deur kos en geheue, en kos in ‘n kulturele konteks.

Ander lekker dinge wat ek doen: My kosrubrieke vir SARIE KOS, en ook Die Burger en Beeld.  Ek het die afgelope 15 jaar ‘n kosprogram op RSG, eers  bekend as Huiskok Glanskok met kosvriend Francois Ferreira , en nou ‘ my program Die Kos wat Ons Ken.  Ons boek Huiskok Glanskok het  ‘n Gourmand Toekenning ontvang.

Genoeg oor my – kom ons praat eerder oor kos.